Tuesday, June 20, 2017

أنواع إعلانات التوظيف المصرية ع الفيسبوك :)

أنواع إعلانات التوظيف المصرية ع الفيسبوك
جميع الحقوق محفوظة لشركة New Egypt Consulting لخدمات التسويق الرقمي و السوشيال ميديا

1- إعلان شيهصني شيرات يا معلم
ده إعلان بيعمله واحد فلحوس ع الفيسبوك
بيكتب فيه إن المكان الفلاني طالبين عشروميت مهندس و محاسب
والرواتب تبدأ من عشيييين ألف جنيه
طبعا مصر كلها بتشير البوست بتاعه
وعداد الفولورز عنده بيضرب
وطبعا لا عزاء لكل الحالمين بالوظيفة اللي مش موجودة أساسا

2- إعلان انت بتاخد كام عشان تشتغل في بيج كومباني
ده إعلان بيكون عامله حد روش من اللي شغالين في التوظيف و مجال
Recruitment
بيكون عايز يعرف مستوى الرواتب لوظيفة معينة
إما لأنه في شركته احتمال يطلبوا نفس الوظيفة
أو لأنه شغال فريلانسر فبيحتاج يعرف

ده عادة بيكون إعلان مفيش فيه لا اسم الشركة و لا ايميل رسمي
ودايما بيكون في شركة كبرى محدش يعرف اسمها
Big Company

أول ما تبعت السيفي ح تجيلك مكالمة لزجة كلها حنان و أدب و ذوق و رقة و رومانسية
وطول المكالمة بتاعت الموارد البشرية ح تشكر في شطارتك و حلاوتك و طعامتك و خبراتك و إنجازاتك
وفجأة تتحول لنمر شرس وهي بتوصل للهدف الحقيقي
والسر المخفي
والتارجت الأصلي
وهو

سيادتك يا أستاذ فلان راتبك الحالي كام؟

طبعا السؤال ده اوعى تجاوب عليه
واهرب منه بشياكة
قول إنه زي الماركت أفيريج
market average
ولو أصرّت اخلع يا معلم واعرف إنك لو قلت مش ح تسمع صوتها تاني
ودايما ركّز إن حاجة زي دي مينفعش تتقال ع التلفون
(وابعت لنا رسالة نقول لك ازاي تهرب من السؤال ده في المقابلة الشخصية عشان السؤال ده مش قانوني و ساعات بيتم سؤاله عشان يعرفوا يقيموا حد تاني أصلا قابلوه و ح يوظفوه بس عايزين يعرفوا سعر حد في نفس مستواه مثلا)

3- إعلان الرواتب المجزية - مجزية دي تبقى خالته مش خالتك
ده صاحب شركة عايز عبيد مش موظفين
بس بيقولها بطريقة شيك
إن عندنا رواتب مجزية
طبعا مجزية دي تبقى خالته مش خالتك

عشان الناس دايما بتطفش منه
وبتسيب الشركة إما لضعف المرتب
أو لعدم آدمية المعاملة وطبيعة الشغل

فالحل الوحيد اللي تفتق عنه ذهنه
إنه ينشر إعلان وظائف ويتكى شوية على كلمة رواتب مجزية
ولو مكتوب في الإعلان "سكن للمغتربين" يبقى عايز مرماطونات مش بس عبيد
عشان دي الحاجة اللي ح يقايض بيها المغتربين من الأرياف على كرامتهم و آدميتهم

4- إعلان الشريك مش الموظف
ده راجل طيب صحي الصبح قرر يفتح شركة
وعشان المهلبية هي شعار المرحلة
ح يكون مطلوب منك تشاركه
وح تلاقي الكلمة دي بالذات كاتبها بالإنجليزي
Partner

ده من الآخر معهوش سيولة
وعايز حد يشتغل من غير راتب
أو براتب رمزي
مقابل اتفاق ودي كده إن اسمك مش موظف ولكن شريك
وطبعا انت ح تفرح بكونك شريك
وفي الآخر ح تلبسوا انتو الاتنين
أو ينصب عليك بعد ما يقف على رجليه ويبيعك
بعد ما عمل اسم و زبون و سمعة على قفاك

الحل:
اتفقوا على كل حاجة قبل ما تشتغلوا - زي الراتب و النسبة هل ح تكون من الأرباح وللا من إيرادات المبيعات ولمدة قد ايه
(خد بالك نسبة من الأرباح دي ممكن تلبسك في الحيط لو صاحب الشركة قرر مثلا يصرف مليون جنيه عشان يعمل إعلان - في الحالة دي الأرباح ح تكون بالسالب)

5- إعلان الكفيل الخليجي
ده إعلان بيوعدك بالرز الكتير
وممكن في المقابلة مع الكفيل
يقابلك في فندق خمس نجوم شيك
وممكن كمان يعزمك في مطعم شيك
طبعا وقتها أحلام الثراء ستداعب خيالك
لكن في الحقيقة هو انت بتشرب أكبر مقلب
عشان ح تخرج من المقابلة تقول ده راجل محترم و كفيل كريم
ولما يجي وقت العقد و الراتب ح تلاقيه أقل من المتوسط لنفس تخصصك وخبرتك
بس سيادتك ح توافق عشان الكفيل ده راجل متطلعش منه العيبة وكفاية ابتسامته و ذوقه مع عمال المطعم
وطبعا لما تسافر ح تقول يا ريت اللي جرى ما كان

6- إعلان وظيفة في التيم بتاعي عشان تشتغلوا معايا يا كلاب
ده عادة بيكون بوست فيسبوك لشاب أو شابة فاشلين إداريا ويمكن سلوكيا
هما بيكونوا موظفين في شركة كويسة إلى حد كبير
و ح تلاقيهم كاتبين بوست يقولوا إنهم بيدوروا على حد يشتغل معاهم
نص البوست بيكون كلام قد ايه هما كويسين و قد ايه الشركة كويسة و قد ايه أعظم الناس شغالين في الشركة
ودايما يتّكوا أوي على كلمة التيم بتاعي و ح تشتغلوا معايا

لو بوستاتهم العادية ع الفيسبوك فيها نفس الإيجو
Ego
فاخلع يا معلم و اشتري دماغك
عشان ح تلبس في شلة مسيطرة جوة شركة
وغالبا ح تلاقي البوست ده منشور بعد إعلان الوظيفة ما اتنشر في مواقع التوظيف بشهر أو اتنين
ليه؟
عشان البهوات عشان فاشلين فهما مش عارفين يختاروا الناس صح
وبيعملوا مقابلات من غير أي نتيجة
ونتيجة إن لسة معرفوش يلاقوا حد فقرروا يعملوا بوست بالبهارات
عشان في الآخر أمثالك تلبس فيهم

غالبا بوستات الناس دي من وقت للتاني بتقول قد ايه هما عظماء و بيعملوا إنجازات و بيشكروا في فريق العمل معاهم بأسلوب لزج كأنهم شغالين عندهم وكده يعني - رغم إنهم كلهم موظفين في شركة ما غالبا مديرها أو صاحبها سايبهالهم يدوروها

الحل:
لو انت ورور لسة متخرج جديد وملكش في الأوفيس بوليتيكس فالناس دي ح تعورك
ومش ح تتعلم منهم حاجة
شوف لك شغلانة تانية إلا لو انت شاطر في مجالك وواثق من نفسك
والأهم ح تعرف تتعامل مع الأشكال دي - لو كده اتوكل على الله خصوصا لو الشركة نفسها كويسة
اللهم إلا لو الشركة ناس كتير كويسة بتسيبها مؤخرا يبقى خيرها في غيرها

7- إعلان البلد دي مفيهاش بطالة و الشباب بيتدلع وأنا مش بضيع يا وديع
ده عادة بيكون بوست فيسبوك لشاب أو شابة لسة مترقيين مدراء ملهمش كام شهر
وعايزين يقولوا إنهم بقوا دلوقتي ما شاء الله بيعملوا مقابلات و يفلتروا سيفيهات و يعدلوا ع الإتش آرات

وعادة شخصياتهم بتكون فيها حب مرضي للسلطة و الأنا لدرجة ممكن يكتبوا بوستات قد ايه مرؤوسيهم بيشكروا فيهم أو قد ايه إنجازاتهم في الشغل و ح تلاقي البوستات دي بالذات محدش من زمايلهم عامل لها لايك أو كومنت

ونتيجة عدم خبرتهم في التوظيف وتطفيشهم للي مقدمين للوظيفة
Candidates
فالحل السهل إنهم يشتكوا في بوست فيسبوك يقول قد ايه الشباب كسلان و مش عايز يشتغل

الحل:
اكتب لهم مبروك الترقية و اعمل منشن لحد إتش آر يقول لهم يعملوا مقابلات ازاي عشان غالبا بيلبسوا في الحيط

لو عجبك اعمل شير للبوست ده ومتنساش تقول إنه نقلا عن مدونة شركة New Egypt Consulting :)

No comments:

Post a Comment